ئەدهەم بارزانی،ئەندامی ئەنجومەنی سەركردایەتی پارتی:سەرۆكی گۆڕان بەرلەوەی حكومەت و پەرلەمان بگۆڕێ،خۆی پێویستی بە گۆڕانە

2011/02/24 at 9:57 AM Leave a comment

سڤیل: پارتی رۆژانی كۆنگرەی زۆر بە گەرمی بەڕێكرد،بەڵام دوای كۆنگرە زۆر سست دەبینرێ، بۆچی؟
ئەدهەم بارزانی: كۆنگرەی 13ی پارتی درەنگ بەسترا، دەبوو لەو ماوەی دوای كۆنگرەی 12 گۆنگرەی 13 و 14 و 15 ببەسترابایە، لەگەڵ ئەوەشدا لەراستیدا كۆمەڵێك بڕیار و راسپاردە دران، بۆ باشتركردنی داهاتوو و بارودۆخی پارتی، بەڵام تا چ ئاستێك پارتی یا گۆنگرەی 13ی پارتی توانی هیوا و داخوازی ئەندامانی پارتی بەجێ بگەیەنن، ئەوە جێگای پرسیارە. پێموایە لەدوای كۆنگرە لەزۆر شوێن ئەوەی من زانیومە و بە من گەیشتووە، نیمچە نیگەرانیەك دروست بووە، كە ئێمە دەمانەویست هەندێك گۆڕانكاری لەسەركردایەتی و شوێنە باڵایەكانی پارتیدا بكرێت، بەڵام هەمان سەركردایەتی كۆن دووبارە لەشوێنەكانی خۆیان مانەوە، ئەمە یەكێكە لەگلەییە هەرە دیارەكانی كادیر و ئەندامانی پارتی. بۆ تاكو ئێستا سستی لەكاروباری پارتیدا هەیە لەدوای كۆنگرە؟ من سستیەكی وا نابینم، بەڵام كۆمەڵێك ئەگەر هەبوون كە بوونە هۆی دواكەوتنی دانیشتنەكانی ئەنجومەنی سەركردایەتی پارتی و دیاریكردنی مەكتەبی سیاسی، دوای ئەوەش هەندێك ئەگەری دیكە هەبوون، كە وەك پێویست دانیشتنەكان بە رێكوپێكی بەڕێوە نەچن، بڕیاریشە لەماوەیەكی نزیكدا كۆمەڵێك بڕیار لەسەر ئاستی سەكردایەتی و دابەشكردنی ئیشوكاری پارتی دەربكرێت.
سڤیل: باست لەوە كرد كە ئەندامانی پێشووی سەركردایەتی و بەتایبەت مەكتەبی سیاسی پارتی لەشوێنی خۆیان داندرانەوە، بەڕای تۆ هۆكاری ئەمە چیە؟
ئەدهەم بارزانی: لێرە زیاتر مەسەلەی شارەزایی رۆڵی بینی، ئەوانەی لەسەركردایەتی و مەكتەبی سیاسی پێشوودابوون، مەلەفاتی پارتی و كاری پارتیان لەدەست بوو، لەبەر ئەوە پێیان باش بوو بۆ ئەم قۆناغە بەم شێوەیە بێت، لەوانەشە ئاڵوگۆڕ لەمەكتەبی سیاسیدا بكرێت لەداهاتوودا، ئەمە بڕیارێكە لەدەست ئەنجومەنی سەركردایەتی تازەی پارتی دایە، بەڵام بۆ ئەم قۆناغە لەبەر ئەم شارەزاییەی ئەوانەی كۆن هەیانبوو لەو مەلەفاتانە، لەشوێنی خۆیان داندرانەوە.
سڤیل: كەواتە ئەو ستافەی مەكتەبی سیاسی پارتی جێگیر نییە و رەنگە بەر لەكۆنگرەی داهاتوو بگۆڕدرێت؟
ئەدهەم بارزانی: من ناڵێم جێگیر نیە، بەڵام قابیلی ئاڵوگۆڕكرنە و دەكرێ گۆڕانكاری تێدا بكرێت.
سڤیل: ئەم گۆڕانكاریە لەبەر بوونی گلەییە، یا تێبینیەك هەیە، یا بیروڕای جیاواز هەیە لەسەر ئەو كەسانەی دەگۆڕدرێن، یا چۆنە؟
ئەدهەم بارزانی: مەبەستم ئەوەیە دەرگای ئاڵوگۆڕكردن كراوەیە، چۆن ئەم مەكتەبی سیاسیە لەئەنجومەنی سەركردایەتی دروست بووە، هەر ئەو ئەنجومەنەش دەتوانێت ئەو گۆڕانكاریەش لەنێو مەكتەبی سیاسیدا بكات گەر پێویست بێت.
سڤیل: جگە لەمەسرور بارزانی بۆچی هیچ كام لەوانەی دیكەی خانەوادەی بارزانی نەهاتنە مەكتەبی سیاسی؟ ژمارەیان لەسەركردایەتی زۆرە، بەڵام نەگەیشتنە مەكتەبی سیاسی؟
ئەدهەم بارزانی: كەسانی دیكە هەن لەمەكتەبی سیاسیدا، كە لێهاتوون و دەتوانن وەك هەر كەسێكی دیكە لەخانەوادەی بارزانی و زیاتریش لەوانە كاری سیاسی و پارتایەتی خۆیان بكەن.
سڤیل: لەو ماوانەدا گلەیی ئەوە لەپارتی دەكرا، كە لەكاتی كۆنگرەدا دروشمی نوێبوونەوە و پێكەوەژیان و دادپەرەوەری كۆمەڵایەتی بەرزكردبووەوە، بەڵام كاتێك گۆڕان بەیاننامەیەكی دەكرد، راگەیاندنی پارتی زۆر بەتوندی و قسەی زبر و هەڵدانەوەی دۆسیەی شەخسی دەستی پێكرد، گلەییەكە لەپارتی ئەوەیە، كە خاوەن كەلتورێكە لەخەباتی خۆیدا كەم جنێو و قسەی زبری بەكارهێناوە، بۆچی لەو ماوەیەدا پەنای بۆ ئەم شێوازە برد؟
ئەدهەم بارزانی: پێنوس لەدەستی رۆژنامەنوسە، لەدەستی هەر كەسێكە كە وتارێك دەنوسێت، هەركەسیش ئازادە هەر شتێك دەنوسێت. ئەوەی لەسەر سەرۆكایەتی هەرێم و سەركردایەتی پارتی حیساب دەكرێت ئەوەیە، كە لەبەیانە رەسمیەكەیدا هاتووە، ئەگەر سەیری بكەی گێرەشێوێن لایەنێك بۆخۆی بە جنێوی حیساب دەكات، ئەی كە كەسێك بێت تەواوی دامودەزگاكانی حكومەتی هەرێمی كوردستان بە پەرلەمان و حكومەت و هەموو دەزگاكانی دیكە، كە بە خوێنی شەهیدان خەباتی ئەم میللەتە بەدی هاتووە، بە بەیاننامەیەكی چەند دێڕی داوای هەڵوەشانەوەیان بكات و بیەوێت دڵی دوژمنانی كوردستان بەو بەیاننامەیە خۆش بكات، ئایا ئەمە گێرەشێوێنی نییە؟ دەتوانی دەستەواژەیەكی دیكە و ناوێكی دیكە بۆ ئەو بەیانە دابنێی؟ مەسەلەن جەنابی سەركردەی ئەم بزاڤە كە بەخۆیان دەڵێن گۆڕان، گۆڕان خۆی پێویستی بەگۆڕان هەیە بەر لەوەی بێ بارودۆخی كوردستان بگۆڕێ و پەرلەمان و حكومەتی كوردستان بگۆڕێ، خودی شەخسیەتی سەرۆكی ئەم بزاڤە پێویستی بەگۆڕان هەیە، دەبێ لەدەروونی خۆیدا خۆی بگۆڕێت، ئەو كەسێكە بەڕاستی كەوتۆتە حاڵەتێكی وا، نازانێت دەستی بگاتە دەسەڵات، ئەوەی لەدەستی بێت دەیكات، بەس بۆئەوەی بە دەسەڵات بگات. لەچاوپێكەوتنی تەلەفزیۆنەكەیان لەگەڵ خودی ئەو شەخسە، چاوپێكەوتنی پێش كۆتایی، زۆر بە راشكاویەوە دەڵێ چیان بۆ ئێمە هێشت؟ “چیان بۆ ئێمە هێشت!!” نەوەزیر و نە مودیر عام، مەبەستەكەی دیارە. من دەڵێم پارتی و یەكێتی چی بۆ ئەوان هێشتووە تاكو ئەمە ئارام بێت؟ خۆیان پێویستیان بە گۆڕان هەیە لەدەروونی خۆیاندا، لەچاوپێكەوتنی كۆتاییشدا دەستەواژەی “ئاشبەتاڵەكان” بەكار دەهێنێت، ئەو بە شۆڕشی میللەتێك دەڵێ ئاشبەتاڵیان كرد، ئایا ئەمە جنێو نیە؟ ئەمە مەنتقی سیاسییە كە خۆی شانازی پێوە دەكات؟ ئەمە دەرچوون نیە لەئادابی سیاسی؟ با گۆڕان بەخۆیدا بچێتەوە، گۆڕان لەخۆیدا دروست بكات، لەناو زات و دەروونی خۆی، پاشان بێتە سەر شتی دیكە. كاتێك كە بارودۆخ دەگاتە ئاستێك، خەڵكانێكی زۆر هەن، پارتی جەماوەری زۆری هەیە. لەزۆر لایەن كە تەماشای دەكەن وەك حزبێكی سیاسی و لەچوارچێوەیەكی دیاریكراو ناوی دەهێنن، وا نیە، پارتی بزاوتێكی جەماوەریە، خێمەیەكە هەموو ئایدۆلۆجیاكانی لەخۆ گرتووە، لەچوارچێوەی پارتێكی بچووك و پەیڕە و پڕۆگرامێك دەرچووە.
سڤیل: پێتوایە ئەو بەیانەی گۆڕان بیركردنەوەی شەخسی سەرۆكی گۆڕانە؟
ئەدهەم بارزانی: هیچ گومانی تێدا نیە، نەوەك هەر بیركرنەوەی شەخسی ئەوە، بەڵكو رق و كینەی ئەوە.
سڤیل: نەوشیروان مستەفا هەم لەبەیاننامەكەی گۆڕان و هەمیشە لەچاوپێكەوتنەكانی باس لەرووداوەكانی تونس و میسر دەكات، پێیوایە لەژێر كاریگەری شۆڕشی ئەو وڵاتانە، پێویستە لەكوردستانیش ئەم گۆڕانكاریانە رووبدەن، پێتوایە كورد چۆن دەتوانێ سوود لەرووداوەكانی تونس و میسر بكات؟ بە هەڵوەشانەوەی حكومەت كە گۆڕان داوای دەكات، یا سوودی دیكەی هەیە كە لەخەیاڵی سەركردایەتی سیاسی كورددا هەیە؟
ئەدهەم بارزانی: پێموایە كەسێك كە ئازاد بێت، لەناو ئێش و ژانی میللەتێك ژیابێت و لەخەبات و تێكۆشان و خوێن و ئارەقڕشتنی میللەتێك تێبگات، دەبێ هەمیشە دان بەو شتانەدا بنێت، كە پێی دەڵێن راستی، یا شەفافیەت. من لەم بۆچوونەوە وەڵامت دەدەمەوە. كورد قوربانیەكی گەورەی داوە، لەژێر دەسەڵاتی چەند دەوڵەتێك بووە، بەتایبەت دەوڵەتی سەدام حوسێن، كە ئەم دیكتاتۆرە هیچ نەماوە لەگەڵ ئەم میللەتە نەیكات، لەكیمیاباران و ئەنفال و وێرانكردنی هەزاران دێهات و سوتاندن و بڕین و كوشتن، تاكو ئێستاش لەئەنجامی تاوانەكانی ئەم دیكتاتۆرە كوردستان وەك دێیەكی وێران دەبیندرێت، لەگەڵ تەواوی ئاوەدانكردنەوەی ئەم وڵاتە لەسەر دەستی حكومەتی هەرێمی كوردستان، بەڵام تاكو ئێستا لەهەر بوارێكدا، بەتایبەت لەبواری دروستكردنی مرۆڤ و پەروەردەی فیكری مرۆڤدا ئەم وڵاتە بە وڵاتێكی وێران دەبیندرێت. ئەگەر ئێمە بێینە سەر راستیەكان، من دەڵێم گەر ئێمەی دوێنێی شۆڕش و پێشمەرگە و خزمەتكاری ئەم وڵاتە و ئەم میللەتە، لەو حاڵەتە جوان و پاك و بێگەردەی تێیدابووین و بەدڵسۆزی لەرێزی خەبات و تێكۆشان و قوربانیداندا بووین، ئەگەر لەم ریزە دەربچین و ببین بە بازرگان و ئامانجەكان و بیروباوەڕەكانمان بكەینە قوربانی مادیات و تیجارەت، هیچ گومانی تێدا نییە ئەمە كۆتایی هەموو شتێكە، نەك هەر بۆ دەسەڵاتی كوردستان، بەڵكو بۆ هەر كەسێك كە خۆی بە خەباتكار بزانێت، گەر بەدوای مادیات كەوت، كە بەداخەوە لەزۆر شوێنیش دەیبینین مادیات بەهێز بووە و بیری شۆڕشگێڕی و نەتەوایەتی خەریكە كەمڕەنگ و لاواز دەبێت، گەر لەم قۆناغە پاكەوە بێینە ئەم قۆناغەی دیكە، كە ئیشی بازرگانەكانە نەوەك ئیشی سیاسیەكان، ئەوا توشی هەڵەیەكی گەورە دەبین. دیكتاتۆری لەناوچووی میسر، لەیەكەمین وتاریدا دوای راپەڕینەكانی میسر، وشەیەكی بەكارهێنا، كە خۆی پاش 30 ساڵ لەدواین كاتەكانی تەمەنیدا تێگەیشت، دەڵێ هەر كاتێك ئابووریی تەنها بۆ ئابووریناسانمان بەجێهێشت، بەڵایەكی گەورەی لێ دروست دەبێت، مەبەستی ئەوەبوو كە تەواوی سیاسەتی میسر و بەرژەوەندیەكانی ئەم وڵاتە و ئەم میللەتەی دایە دەستی هەندێك كۆمپانیا و ئابووریناس، كاری سیاسی لەسەر نەكرا، یان ئابووریی لەگەڵ سیاسیەت بەڕێوە نەچوو. ئێستا بەداخەوە لەكوردستانیش هەندێك شت روودەدەن، شوێنی ئەو كەسانە بەرز دەبێت، كە زیاتر پسپۆرن لەئابووریناسیدا نەوەك لەسیاسەتدا، دەبێ هەمیشە ئابووریی لەخزمەتی سیاسەتدا بێت، بەڵام ئێستا بە پێچەوانەوەیە. من لێرەدا مەترسیەكی گەورە دەبینم.
سڤیل: پارتی بە درێژایی هەر قۆناغێك پلانی بۆ ئەو قۆناغە هەبووە، بۆ دەربازبوون لێی و زاڵبوون بەسەریدا، ئەی ئێستا كە باس لەگەندەڵی و كەموكوڕی و بێكاری و دیواری نێوان بەرپرسان و خەڵك دەكرێت، بۆچی پڕۆژەی نیە؟ بۆ ناتوانێت بەسەر ئەمەدا زاڵ بێت؟
ئەدهەم بارزانی: من دەگەڕێمەوە بۆ ئەو قسەیەی كە بەر لەم پرسیارە كردم، هەندێك لەو باوەڕەدابوون، كە ئێمە دەبێ هەموو شت بۆ ئاوەدانی و پێشكەوتن و بیناسازی و جادە و خۆشگوزەرانی بكەین، كار بۆ ئەوە بكەین و شتەكانی دیكە گرنگ نین، ئەمە باشە گەر بۆ میللەت پێشكەوتن و ئاوەدانی و خۆشگوزەرانی هەبێت، بەڵام بۆ ئەم مەبەستە دەبێ بەرنامەیەك و سیاسەتێكی دیاریكراوی ئابووری هەبێت، كە چوارچێوەیەكی یاسایی هەبێت و كۆنتڕۆڵی بكات و لێی دەرنەچێت، دەبێ كەسانێك هەبن لەژێر هەر ناوێكدا، كە چاودێری ئەم كارە بكەن، دەبێ ئەم كارە لەپڕۆژەی خەڵكدا بێت. زیاتر بزاڤی ئابووری لەكوردستاندا سوودە گەورەكەی بۆ كەسانێكە، نەوەكە بۆ خەڵكانێكی زۆر. لێرەدا تاكو وشیاری دروست بوو، كە بەڵێ كە بەرەوپێشچوونی ئابووری بێ كۆنتڕۆڵ زەرەری لێكەوتەوە. باسی گەندەڵی كە دەكرێت، من پێم وایە كەس باسی گەندەڵی ناكات. ئەو كەسەی باسی گەندەڵی دەكات، ئایا خۆی گەندەڵ بووە یان نا؟ ئەمە پرسیارێكی گرنگە. گەر كەسێك لەسەر جادە وابڵێت، دەتوانێ تا بەیانی باسی بكات و هەر بڵێ گەندەڵی هەیە، ئەگەر كەسێك لەئاستی بەرپرسیاریەتی دابێت، كە دەڵێ گەندەڵی هەیە، كاكە ئیتر جەنابت بەرپرسی، چۆن قبوڵت كردوە گەندەڵی هەبێ؟ بۆ چارەیەكت بۆ دانەناوە چ لەبواری ئیداری و بواری سیاسیدا؟ لەبورای سیاسیدا مەبەستم ئەوەیە ئەگەر حیزبایەتیە بۆ لەبەرنامەی حزبدا بۆ پێشگیریت نەكردوە لەگەندەڵی، رێگات لێی نەگرتوە؟ گەر لەبورای ئیداریدایە جەنابت حكومەتی یا وەزیری یا مودیرعامی، بۆچی رێگریت نەكردوە لەگەندەڵی و باسی دەكەی؟ لەكوێ گەندەڵی هەیە؟ ئایا بەڵگەیەك هەیە گەندەڵی هەیە؟ من جەنابی سەرۆك دەبینم زۆر جار باس دەكات، ئەگەر بەڵگە هەیە لەسەر گەندەڵی با پێشكەش بكرێت، تاكو بەدواداچوونی لەسەر بكرێت. بەڵام تا ئێستا بەڵگەیەكم نەبیینوە، كەچی كە بارودۆخەكە دەبینم، هەمووی گەندەڵیە. ئەگەر بچم بۆ بەلەدیاتێك، كە ئەم حاڵەتەی زۆرە، بۆ شارەوانی شارێك و شارەدێیەك و گەڕەكێك، هەموو كارەكانی بەشێوەی یاسایی بەڕێوە دەبات، بەڵام جەنابی بەڕێوەبەری شارەوانی فڵانە شوێن، من ئەدهەم بارزانی وەك ئەندام پەرلەمانێكی خانەنشین موچەی من دوو بەرامبەری موچەی جەنابتە، بۆ من ناتوانم هەر رۆژە و سەیارەیەك بكڕم؟ هەر رۆژە و گۆڕانكاریەك لەژیانمدا بكەم، بۆچی جەنابت هەر رۆژەی دەتوانی خانوویەك دروست بكەی و چەندین خانوشت دروست كردوە؟ هەر رۆژە و دەتوانی چەند مۆدیلێكی سەیارەكەت بگۆڕی؟ كە دەیگۆڕی لەكوێی دەهێنی؟ ئایا كەسێك هەیە پێی بڵێ لەكوێت هێناوە، یا وەزیری شارەوانی پێی بڵێ فڵان وەرە موچەكەت ئەوەندەیە، ئەوانەی دیكەت لەكوێ هێناوە؟ هەروەها لەشوێنەكانی دیكە و لەهەموو بوارە ئیداری و حیزبیەكاندا. ئەگەر سەرۆك حزبێك موچەی بە ئەندامەكانی دابێت و جگە لەوەش هاوكاری كردبێت، خۆی هەمووی دەزانێت بە شێوەیەكی یاسایی چەندە هاوكاری كردوە، سەرۆكی حزب دەتوانی هاوكاری كادیرێك یا بەرپرسی لقێك بكات جگە لەموچەكەی، ئایا رۆژێك لەرۆژان پێی گوتراوە وەرە جەناب جگە لەو هاوكاریە ئەوەی دیكەت كە كردوە و لەبەر چاوی خەڵكە و ئینكاری ناكرێت لەكوێت هێناوە؟ ئەمە نەكراوە كە نەشكرێت بەڵگە لەكوێ دەبێت؟ بەڵگە نیە كاكی خۆم، دەبێ موحاسەبە و بەدواداچوون هەبێت، تاكو خەڵك بێتەوە سەر رێگای راست و دروست و شەفافیەت لەژیان.
سڤیل: كەواتە ئێستا كاتی ئەوە هاتووە بە بەرپرسەكان بگوترێت من این لك هژا؟
ئەدهەم بارزانی: زۆریش تێپەڕیوە، دەبوو زۆر پێش ئێستا پرسیار كرابایە ئایا ئەدهەم بارزانی ئەم خانووەی كە دروستت كردوە لەكوێت هێناوە؟ دەزانم دوێنی هیچت نەبووە ئەمڕۆ لەكوێت هێناوە؟ با من شەخسی خۆم تەواوی فایلەكانی خۆم لەبەر چاوی جەنابت دابنێم. دەبێ كار بەو شێوەیە بكرێت.
سڤیل: بەڵام بۆ نەكراوە؟
ئەدهەم بارزانی: ئەڵڵاهو ئەعلەم.
سڤیل: كاك مەسعود لەكۆبوونەوەی لەگەڵ كاسب كاران دەڵێ دەبێ ئەم بارودۆخە چاك بكرێت، ئەگەرنا بڕیاری تر دەدەم، ئەو بڕیارانە دەبێ چیبن بە بۆچوونی جەنابت؟
ئەدهەم بارزانی: باسی جەنابی سەرۆكت كرد. با شتێكت پێ بڵێم. گوتنەكانی ئەویش لەو شوێنە دەرناچن كە من باسم كرد. ئێمە خزمایەتیەكمان هەیە، من لەبەردەم جەنابت و بۆ مێژووش وادەڵێم، شەخسی جەنابی سەرۆك كەسایەتیەكی پاكە، دڵسۆزە، خەمخۆرە، سیفاتی تەواوی رێبەری تێدایە، لەهەموو روویەكەوە. لێرە كۆمەڵێك رێبەر و سەركردە بە درێژایی مێژوو هەڵكەوتوون، بۆ دوو بەش دابەش دەبن، هەندێكیان بڕیار لەسەر ئاستی رووداو و لەگەڵ رووداو بەكاتێكی زوو بڕیار دەدەن، بەشێكی تریان چارەسەر و بڕیاردان هەڵدەگرن بۆ ئەوكاتەی زەمان و كات چارەسەری بارودۆخەكە بكات. من لەزۆر لەبڕیارەكانی جەنابیاندا، بڕیارەكانی لەدەستەی دووەمدا دەبینم، وا بۆ هەندێك شت دەچێت، وەك ئەوەی بڵێت ئایا ئەدهەم بارزانی تۆ نازانی چاكە لەكوێیە و خراپە لەكوێیە؟ ئایە ئەو ئاستەت لەتێگەیشتن نیە كە بچی بۆ رێگای باش و نەچی بۆ رێگای خراپ؟ لەخراپی دوور بكەی و لەباشە نزیك بكەوی؟ زۆر بە سادەیی. زۆرجار باس كراوە، ئایا جەنابتان بۆ بڕیارێك لەم بابەتە نادەن؟ وەڵامەكەی ئەوە بووە، ئایا ئەو كە خۆی لەو ئاستەدا دەبینێت، تخوا من چی پێ بڵێم؟ خۆی نازانێت هەڵەی كردوە؟ زۆرجار ئەمە بۆ كات جێدەهێڵێت كە هەر لایەنێك ویژدانی بێت و حوكمی لەسەر بدات. بەڵام ئەمە بۆ ئەم كاتە بووە كە تاكو ئێستا هاتووە، من لەو باوەڕەدام جەنابیان كە لەمن بێئومێد بوو كە قابیلی چاكسازی نەبم و خۆم دروست نەكەم، ئەوكات مەجبوورە بە من دەڵێ بەڵێ عەزیزی من و هەڤاڵی من، لەسەنگەرێك دابووی لەگەڵ من، بەڵام مەجبوورم لەمڕۆ بەدواوە سنورێكت بۆ دابنێم. یان بەو شێوەیە لەخزمەت بەردەوام دەبی، یا دەبێ واز لەسیاسەت بهێنێت، بڕۆ هەر ئیشێك دەیكەی بیكە. باش لەبیرم دێت لەكردنەوەی خولی دووەمی پەرلەمانی كوردستان، كە هاتە پەرلەمان، مام جەلالیشی لەگەڵ بوو، كاك مەسعود گوتی ئەوەی لەحكومەت دابێ، دەبێ لەبازرگانیدا نەبێت، ئەوەی مەشغولی كاری حكومەتە، دەبێ لەبازرگانی دوور بكەوێتەوە. بەڵام یەكێك لەكێشە گەورەكانیش ئەوەیە، كاتێك سەرۆك شتێك دەڵێت، دەبێ دامودەزگایەك هەبێت بۆ بەدواداچوونی قسە و ئەمر و دەستوورەكانی ئەو. كە ئەم قسانە لەپەرلەمان كران، ئایا چ دەزگایەكی حكومەتی هەرێم و لەناو خودی پارتی كە بەدواداچوون بۆ ئەو ئەمرەی سەرۆك بكات، ئەوەی لەحكومەتدایە نابێ لەبازرگانیدا بێت. موتابەعە نەكراوە، ئیتر زۆر شت هاتۆتە پێش تا بەم قۆناغە گەیشتووە. نەبوونی هەندێك یاساش لەكوردستان كێشە بووە، ئێمە شانازی بە حكومەت و پەرلەمانمان دەكەین، كە خەریكە بە ئاقاری وڵاتی دامودەزگای موئەسەساتیدا دەڕوات، بەڵام تاكو ئێستا ئێمە دەستوورمان نیە، دەستوور لەپەرلەمان دەرنەچووە، ئایا چ حكومەتێك و میللەتێك هەیە كە بنەمای دەستووری نەبێت، كارەكانی تری بە دروستی بەڕێوە بچێت؟ كە لەپەرلەمانیش بووم لەچەندین موداخەلەدا داكۆكیم لەوە دەكرد، كە هەر یاسایەك لەپەرلەمان دەربچێت، بەڕاستی ناتوانین بە یاسای دابنێین، تا بنەمایەكی دەستووری نەبێت. تاكو ئێستا ئەوە چەند ساڵە حكومەتی هەرێم دروست بووە 19 ساڵە هەر بڕیار و یاسایەك لەپەرلەمان دەرچووبێت، بێ بنەمای دەستووری بووە، ئەم وڵاتە دەستووری نیە، ئیتر چۆن دەبین بە موئەسەساتی؟ بێ دەستوور كار ناكرێت.
سڤیل: ماوەیەكە گۆڕان بۆ هەر ئامانجێك خەڵك دێنێتە سەر جادە، ئەگەر ئەم جارە گۆڕان خۆنیشاندانەكان بگەیەنێتە ئاستێكی دیكە، پێت وانیە لەسلێمانی زەمینە بۆ ئەم كارەی گۆڕان لەبارتر بێت؟
ئەدهەم بارزانی: حۆپیشاندانی خەڵك بۆ مافی خۆیان و چاكسازی، ئەوە مافی خەڵكە و نابێت كەس رێی لێ بگرێ، من پێموایە ئەگەر خەڵكانێك ئەم خۆپیشاندانە ببەنە قۆناغێكی تر، دەبێ خەڵك خۆیان بەرەنگاری ئەو كەسانە ببنەوە، كە دەیانەوێت خۆنیشاندانەكە بگەیەننە قۆناغێكی تر و بە خۆیان دەڵێن گۆڕان. كێن ئەوانەی گۆڕان بەڕێوە دەبەن؟ ئایا ئەمانە دێن لەپشت خەڵكێكی دڵپاك و دڵسۆز و گەنج و خاوەن داخوازی بۆ بەرەوپێشبردن و جوانكردنی كوردستان رادەوەستن؟! من لێرەوە بەو خەڵكانە دەڵێم جەنابتان بەهەڵەدا چوون، ئەگەر ئەمە داواكاری خۆتانە وەك گەنجان و كەمی خزمەتگوزاری، ئەوە دەستتان خۆش بێت، بەڵام ئەگەر كەسانێك كە من حەز ناكەم هەر ناویشیان بێنم، لەپشت ئەوان بن، ئەوە خودی ئەوان پێویستیان بەگۆڕان هەیە لەدەروونی خۆیاندا، كەسانێك نین جەماوەر پشتیان پێ ببەستن.
سڤیل: بەڵام ئەوە واقیعە كە ئەوان 25%ی پەرلەمانیان بەدەست هێنا و خەڵكێكیشان لەگەڵە؟
ئەدهەم بارزانی: ئەو 25% لەوانەیە واقیع بێت، بەڵام هەمیشە واقیع واقیعێكی راستەقینە نیە، هەندێك جار هەیە وەك عەرەب دەڵێن واقیعی كازیبە، ئەم 25% نە لایەنگیری ئەوانن، بەڵكو بێزار ببوون لەدەستی هەندێك لایەنی دیكەی سیاسی، لەبێزاربوون لەلایەنە سیاسیەكانی دیكە دەنگ بەوان دراوە، نەوەك لەبەر خاتری چاوی بەڵەكی ئەوان.
سڤیل: كەواتە پێتوایە دەنگیان لەكەمبوونەوە و پاشەكشە بێت؟
ئەدهەم بارزانی: من لەوەدا هیچ گومانم نیە، راشیدەگەیەنم كە زۆریان تەنانەت پەیوەندیان بە منیشەوە كردوە، كە پەشێمانن لەوەی رۆژێك دەنگیان بەم لیستە داوە و ئامادەن بگەڕێنەوە. ئەگەر سبەی هەڵبژاردنێكی ئازاد بكرێت، پێم وایە ئەو 25%ی ئەوان زۆر لەرێژەی خۆیان زۆرترە.
سڤیل: جگە لەوەی گۆڕان دەیڵێت، پێت وانیە ئەم حكومەتە ساردوسڕی و شلۆقی پێوە دیارە، پێت وانیە پێویستە گۆڕانكاری لەحكومەت بكرێت؟
ئەدهەم بارزانی: بەڕاشكاوی پێموایە تاكو ئێستا بەداخەوە، من كە ئەندامی ئەنجومەنی سەركردایەتی پارتیم، لەگەڵ یەكێتی دوو حزبی سەرەكین لەحكومەتدا، بەڵام تا ئێستا حكومەتێكی هەرێمی كوردستانمان نییە، تائێستا حكومەتی هەولێر و سلێمانیمان هەیە، ماوەیەك پێش ئێستا باسی سەربەخۆیی ئیدارەی هەڵەبجە و نازانم كوێ كرا، برا بۆ باس لەسەربەخۆیی ئیدارەی سۆران و زاخۆش ناكەی؟ لێرەدا ئەم كەموكوڕیانەی لەئیدارەی حكومەتی ئێمەدا هەیە، ئەم وەزعەی خوڵقاندوە، نەیتوانیوە وەك پێویست بێتە ناو خەڵك. ئەگەر خەڵك گلەییشی هەیە لەحكومەت، بۆ ئەو گلەییانە ئاڕاستەی جەنابی سەرۆكی هەرێم دەكەن؟ ئەمە كاری حكومەتە، دەبێ ئاڕاستەی حكومەتی هەرێمی كوردستان بكرێت، ناڵێم هیچی نەركردوە، بەڵام وەكو پێویست بە ئەركەكانی خۆی هەڵنەستاوە. یاسای خۆپێشاندان لەپەرلەمان دەرچووە بە زۆرینەی دەنگ، لەهەر سیستەمێكی دیموكراتیشدا هەر وایە، ئەم یاسایە دەبێ حكومەت جێبەجێی بكات و كاری لای سەرۆكی هەرێم نیە، تەنها لەماوەی یاساییدا لەماوەی 15 رۆژ یا ئیمزای بكات یا بیگێڕێتەوە بۆ پەرلەمان، لێرەدا حكومەتی هەرێم روونكرنەوەی بۆ خەڵك نەدا، شتەكە هاتەوە سەر سەرۆكی هەرێم، بۆ؟ لەرووی یاساییەوە ئەمە كاری سەرۆكی هەرێم نیە، حكومەت دەبێ ئەم یاسایە جێبەجێ بكات، دوای ئیمزاكردنی سەرۆكی هەرێم دەبێ سەرۆكی حكومەت ئیمزای لەسەر بكات و بیداتە وەزارەتی ناوخۆ، كە بەپێی ئەم یاسایە هەڵسوكەوت لەگەڵ هەر خۆپێشاندانێك بكات، لەزۆر بواری تریشدا كەمتەرخەمی زۆر هەیە لەئەدای حكومەتی هەرێمی كوردستان، ناتوانین ئینكاری ئەوە بكەین.

Entry filed under: ئه‌دهه‌م بارزانی‌. Tags: .

قوربانییەکانی خۆپیشاندانەکەی شاری سلێمانی به وێنه فه‌رمانی ده‌ستگیركردنی رێكخه‌ری خۆپیشاندانه‌كه‌ی زانكۆی سلێمانی ده‌ركرا

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Trackback this post  |  Subscribe to the comments via RSS Feed


RSS هه‌واڵه‌کانی BBCی به فارسی

  • An error has occurred; the feed is probably down. Try again later.

RSS بابەتەکان لە بالاترین به فارسی

  • An error has occurred; the feed is probably down. Try again later.

RSS بي بي سي -العربية

  • An error has occurred; the feed is probably down. Try again later.

ژمــــاره‌ی ســــه‌ردان

  • 721,937 hits

%d bloggers like this: