پێویسته‌ بزووتنەوەى کرێکارى و بزووتنەوەکانى ژنان و لاوان،کۆڵەکە ئەسڵیەکانى ئەم بزووتنه‌وه‌یه‌بن

2011/03/13 at 5:40 PM Leave a comment

کۆمۆنیست:راپه‌ڕین و خرۆشانی جەماوەری میسرو تونس وڵاتانی تری عەرەبی،سەرەتای دەورەیەکی نوێیە، کاریگەری ئەم روداوانە لەسەر عێراق و کوردستان چۆن که‌وتوه‌ته‌وه‌‌؟
ریبوار ئەحمەد:راپەرینى شۆرَشگێڕانە لە تونس و میسر هەموو جیهانى خستوەتە ژێرکاریگەرى خۆیەوە. لە ئاستێکى فراواندا کۆمەڵێک بیربۆچون کە دەیان ساڵە سایەیان کردبوو، لە ژێر کاریگەرى ئەو رووداوانەدا هەڵگەڕانەوە. بە تایبەتى دەربارەى تواناى جەماوەر بۆ ئاڵوگۆڕو  ئیرادەنواندن لەسەر چارەنوسى خۆى. ساڵەهایە ئەو بیروبۆچونە لە کۆمەڵگاى بەشەریدا پەراوێزخرابوو کە جەماوەرى کرێکاران و کۆمەڵانى ستەمدیدە دەتوانن بە هێنانەمەیدانى هێزى جەماوەرییان، دەسەڵاتە ستەمکارو سەرکوتگەرەکان هەڵپێچن. رووداوەکانى تونس و میسرو ووڵاتانى ترى ناوچەکە لە پێش هەموو شتێکدا دەورێکى زۆریان گێڕا لە گێڕانەوەى بڕوا بە خۆبونى جەماوەرو نیشاندانى تواناى  لەبن نەهاتوى ئەوان بۆ ئاڵوگۆڕ.
رادەى ئەو کاریگەریە لە عێراق و کوردستاندا زۆر گەورەو راستەوخۆیە. بە تایبەتى کە ئەم کۆمەڵگایانە ساڵەهایە هەر وەکو تونس و میسر بەدەست زوڵم زۆر و ستەم و سەرکوتێکى لە رادەبەدەرەوە دەناڵێنن. پێشتر ئیستبدادى بەعس و ئەم ساڵانەى دوایش ملهورى ئەمریکاو دەسەڵاتى لایەنە ناسیونالیستیە کوردو عەرەب و ئیسلامیەکان، دانیشتوانى عێراق و کوردستانیان لەگەڵ تەڵخترین سیناریۆکاندا بەرەڕوو کردوە. ساڵەهایە ناڕەزایەتی و نەفرەتێکى زۆر لەو هەلومەرجە کۆمەڵگاى داگرتووە و جەماوەرى بەرینى ستەمکێش خوازویارى ئاڵوگۆڕن. بەڵام ئەو بڕوایە زۆر لاوازبوو کە هێزى خەڵک بتوانێ ئەو دەسەڵات و لایەن ستەمکارانە هەڵپێچێت. تەجروبەکانى تونس و میسر، بە چۆکدا هاتنى دەسەڵاتە دکتاتۆرو ستەمکارەکانى ئەو ووڵاتانە لە ئاست هاتنەمەیدانى ئیرادەى جەماوەر، تەجروبەکانى یەکدەستبونەوەى خەڵک لە دەورى ئەو دروشمانەى کە زامنى ئاڵوگۆڕبوون، شێوەکانى خەباتى جەماوەرى لەو ووڵاتانە کە دەکرێت بڵێن گەلێک دەسکەوت و تاقى کردنەوەى تازەیان خستە بەردەستى مرۆڤایەتى….ئەو باوەڕەى لە نێو جەماوەرى کرێکارو زەحمەتکێش و ئازادیخوازى عێراق و کوردستانتیشدا بەهێزکرد، کە بۆ گۆڕینى هەلومەرج و چارەنوسێکى روناک پێ بنێنە مەیدانەوە.
بەو هۆیەشەوە کە هەمان زەمینە ماددى و کۆمەڵایەتیەکانى شۆڕش و راپەڕین لە تونس و میسر، لە کوردستان و عێراقیش، لە ئاستێکى بەرزدا لە ئارادا بوو،  بۆیە هەر بە نەسیمى ئەو رەوتە شۆڕشگێڕانەیە، ئاڵاى شۆڕش دەستى بە شەکانەوە کرد. زەمینەى کاریگەرى ئەو رووداوانە لەسەر عێراق و کوردستان، ئەوەندە بەهێزو چاوەڕوانکراوبوو، پێش ئەوەى جەماوەرى کرێکارو زەحەتکێش پێى بێنە جۆش و خرۆش، دەسەڵاتداران کەوتنە دڵەڕاوکێ. لەلایەکەوە بە فراوانى باس و مەوعیزەى ئەوەیان دەست پێکرد کە کۆمەڵگاى کوردستان و عێراق جیاوازە لە میسرو تونس و نابێ و ناکرێ ئەو رووداوانە لێرە دوپات بنەوە، لەلایەکى تریشەوە کەوتنە هەڵخڕادنى پێشوەختى باسى ئەوەى کە ئەگەر فرسەتى زۆرتر بەوان بدرێت لە بەرنامەیاندا هەیە گیروگرفتەکانى خەڵک چارەسەر بکەن. هێشتا ئەوان لەو هەوڵ و پەلەقاژانەدا بوون بۆ بەرگرتن لەو کاریگەریە، شەپۆلى شۆڕش و راپەڕین گەیشتە سەر خۆیان. ئێستا ئەوە زیاتر لە دوو هەفتەیە، لە پێشدا کوردستان و بەدوایدا عێراق، کەوتونەتە سەر رێگایەک کە خەڵکى تونس و میسر تا ناوەڕاستى رۆیشتون. خۆپیشاندان و هاتنەمەیدانى جەماوەرى زۆرێک لە شارو شارۆچکەکانى گرتوەتەوە.  

 کۆمۆنیست: هەلومەرجی سیاسی عێراق و کوردستان، جیاوازی زۆری هەیە لەگەڵ وڵاتانی عەرەبی، لەعێراقدا تا ئێستا دەوڵەتێکى یەکدەست و یەکگرتوو قەوارەى نەگرتووە، لەهەلومەرجێکی ئاوادا، راپەرێن و شۆڕش بە کام ئاراستەدا دەڕوات و روبەروێ کێیە؟
رێبوار ئەحمەد: راستە ئەو هەلومەرجەو دەسەڵاتى هەر ملیشیایەک بەسەر ناوچەیەکدا، هۆکارێکە بۆ ئاڵوزى و سەختى ئەو ئاڵوگۆڕەى کە دەبێ رووبدات و بە مانایەکیش گرفتێکى گەورەیە لەبەردەم رەوتى گۆڕینى شۆڕشگێڕانەى هەلومەرجەکە. بەڵام لەگەڵ ئەوەشدا وا نیە کە نەزانرێت بزووتنه‌وه‌ شۆڕشگێڕانه‌یه‌ روو لە کێ بکات. لە عێراقدا حکومەتى بۆرژوازى هاوبەشى ناسیونالیست و ئیسلامیەکان بە سەرۆکایەتى نورى مالکى و لە کوردستانیشدا حکومەتى بۆرژوا ناسیونالیستى حیزبەکانى بزووتنەوەى کوردایەتى، بە شێوەى راستەوخۆ لەبەرامبەر ئەم بزووتنه‌وه‌یه‌دا راوەستاون. ئەو دوو حکومەتە بە هەموو ناکۆکیەکانى دەرونى خۆیانەوەو بە پێکهاتەى ئاڵۆزیانەوە، هۆکارى راستەوخۆى هەلومەرجى ئێستا و داسەپێنەرى ئەو ستەم و بێمافیەن کە بەسەر جەماوەرى ملیونى خەڵکى عێراقدا فەرزکراوە.
بەم مانایە خه‌ڵکی کوردستاندا بۆ گەیشتن بە ئامانجەکانى خۆیان دەبێ کارى خۆیان لەگەڵ دەسەڵاتى میلیشیایى یەکێتى نیشتمانى و پارتى دیموکراتى کوردستان یەکلابکه‌نەوە. ئەم دەسەڵاتەش بە کردەوەو لە مەیدانى واقعدا بەسەر دوو ناوچەدا دابەش بووە. ناوچەکانى سەر بە پارێزگاى سلێمانى لە ژێر دەسەڵاتى یەکێتى نیشتمانیدایە و ئەودواى لە ژێردەسەڵاتى پارتیدایە. ئەمە تایبەتمەندیەک بە خەباتى خەڵکى هەریەک لەو ناوچانە دەبەخشێت و رەنگە رەوتى پێشڕەوى و چونەپێشیان هاوتا نەبێت، بەڵام گومان لەوە نیە کە پێشڕەوى لە هەر ناوچەیەکدا کاریگەرى زۆرو هەمەلایەنەو تەنانەت دەسکەوتى راستەوخۆیشى دەبێت لەسەر ناوچەکەى تر.
لە ئاستى سەراسەرى عێراقیشدا، دیسان دابەشبونێکى بەو جۆرەى دەسەڵات هەیە و بگرە ئاڵۆزتریشە، بەشێک لە ناوەڕاست و خواروى عێراق دابەش بوە بۆ چەند ناوچەى دەسەڵاتى رەوتە ئیسلامیە شیعە مەزهەبیەکانى سەر بە جمهورى ئیسلامى ئێران، بەشێکى ناوەڕاست و رۆژئاواى عێراقیش کەوتوەتە ژێر دەستى رەوتە ناسیونالیستە عەرەبەکان و رەوتە ئیسلامیە سونى مەزهەبەکانەوە. بە گشتى ئەوەى لە عێراقدا وەکو دەسەڵات و دەوڵەت چاوى لێدەکرێت، لە واقعیدا تەرتیباتێکى سیاسیە کە لە ئەنجامى کێشمەکێشى لایەنەکانى بەشدار و بەپێى هاوسەنگى هێزى نێوانیان، هەروەها بە دەورو دەخاڵەتى ئەمریکاو دەوڵەتانى ناوچەکە، وەکو حاکمیەتى چینى بۆرژوازى عێراق رێکخراوە. ئەمانە سەربارى ئەوەى لە نێو خۆیاندا جۆرەها کێشەیان هەیە و لە روانگەى هەر یەک لە رەوت و لایەنەکانى بەشدار لەو حکومەتەوە، پێویستە دەسەڵاتى ئێستا بگۆڕێت بۆ ئەلگۆى جێگا مەبەستى خۆى و لەسەر ئەو بناغەیە پێناسەى سیاسى و ئایدۆلۆژى بۆ سیستەمى سیاسى بکرێت، بەڵام هەموو لەسەر داسەپاندنى مەحرومیەت و بێمافى بەسەر خەڵکى کرێکارو زەحمەتکێشى عێراقدا هاوڕان. ئەوەى ئێستا خەڵکى عێراق لەبەرامبەریدا راپەڕیوە، واتە زوڵم و ستەم و فەسادى و برسێتى و بێمافى سیاسى…بنەماى هاوبەشى پلاتفۆڕمى سەرجەم رەوتەکانى بەشدار لە دەسەڵات پێکدەهێنێت.
بێگۆمان لەو ناوچە جیاجیایانەى عێراقیشدا، ناهاوتاییەک هەم لە رادەى پەرەسەندنى خەباتى جەماوەرى و هەم رادەى سەقامگیربوونى سەرکوتى دەسەڵاتى میلیشیاییدا هەیە. بەڵام نە لە کوردستان و نە لە عێراق، ئەو دەسەڵاتە ناوچەییانە نەیتوانیوە هەموو لێکهەڵپێکراوى سیاسى و ئابورى و کۆمەڵایەتى و تەنانەت فکرى، نێوان دانیشتوانى ئەم ناوچانە بپچڕێنن. بۆیە لە هەموو روویەکەوە لەژێرکاریگەری یەکتردان و هەر ئاڵوگۆڕو دەستکەوت و پێشڕەویەک لە هەر گۆشەیەکى کۆمەڵگادا بێت، کاریگەرى لەسەر سەراسەرى عێراق دادەنێت. بۆ ئاڵوگۆڕى بنەڕەتیش لە عێراقدا دەبێ لەگەڵ ئەم دەسەڵاتە و هەموو کۆڵەکە ناچەییەکانیدا حیساب یەکلابکرێتەوە.
کۆمۆنیست: داخوازییە بنەرەتیەکانی خەڵکی عێراق و کوردستان کامانەن و ڕیگای بەدیهێنانیان کامەیە؟
رێبوار ئەحمەد: خەڵکى عێراق و کوردستان خوازیارى ئاڵوگۆڕێکى بنەڕتین لە ژیان و گوزەراندا. بەدەست هەژارى و بێدەرەتانى و بێکارى و نەبونى خزمەتگوزاریە سەرەتاییەکان و سەرکوت و ملهوڕى سیاسیەوە بە دەنگ هاتوون. بێکارى و گرانیەکى کەمەرشکێن ئەم کۆمەڵگایەى داگرتووە، هیچ خزمەتگوزرایەکى سەرەتایى وەکو ئاوو کارەباو تەندروستى و رێگاو بان و هاتوچۆ و پاک و خاوێنى شارەکان و مەسکەن…بۆ خەڵک دابین نیە یان لە خراپترین ئاستى خۆیدایە. ساڵ دەڕوات و بەڵێنە یەک لە دواى یەکەکانى دەسەڵات بە درۆ دەردەچێت و بارەکە هەر بەرەو خراپى دەڕوات. ئەوەى پێى دەوترێت فەسادى لە عێراقدا گەیشتوەتە ئاستى تاڵان و برۆیەکى بێسنور، داهاتى زۆرو زەبەندى نەوت، چ ئەوەى بە رێگاى رەسمى و ئاشکرا دەفرۆشرێت و چ     ئەوەى بە لێشاو بە دزیەوە دەفرۆشرێت، دەچێتە دەست و گیرفانى تاقمێکى کەم لە دەسەڵاتداران و بەرپرسانى لایەنە دەسەڵاتدارەکانەوە. کەسانى وەکو مالکى و تاڵەبانى و بارزانى و حەکیم و عەلاوى ..و…کە چەند ساڵ لەومەبەر بەدەست و گیرفانى بەتاڵەوە، بە هۆى جەنگ و وێرانکارى ئەمریکاوە لە  سەر کورسى حوکم دانران، ئێستا لەو کەڵە سەرمایەدارە ملیاردێرانەن کە پوڵیان لە بانکەکانى جیهاندا کەڵەکە بووە. سەرچاوەکان باسى ئەوە دەکەن کە لە عێراقدا بە دەیان ملیاردێرى دۆلارو بە هەزاران ملیۆنێرو بە ملوێنەهاش خەڵکى برسى و بێدەرەتان هەیە. بێدەرەتانى بۆ ملوێنەها کەس بووە بووە بە بنەماو سەرچاوەى قەڵاى سەرمایە بۆ چەند هەزار کەسێک.
تەنانەت ئەو مقدارە مەوادى خۆراکیەى کە لەسەردەمى رژێمى بەعسەوە دەسەڵات ناچاربوە بە شێوەى مانگانە بیدات بە هاوڵاتیان، تا هاتووە بەرەو خراپى و کەم بونەوە رۆیشتووە. کۆمپانیاکانى هێنانى ئەو مەوادانە لە دەرەوەى ووڵاتەوە، کۆمپانیاى سەر بە لایەنەکانى دەسەڵاتن. نزیک بە هەموو ئەو مەوادانەى کە دەیهێنن یان کاتى بەکارهێنانیان بەسەر چوە یان لە خراپترین کەفیەتدان. بۆ نمونە ئەو چایەى کە دەیدەن بە هاوڵاتیان، بۆ بەکارهێنان ناشێت، بۆیە هاوڵاتیان لە بازاڕدا بە نرخى خۆڵى ناو باخچە دەفرۆشنەوەو بەکاردێت بۆ ئەوەى لە جیاتى خۆڵى نەرم بکرێتە بن دارو درختى باخچەکانەوە. بەڵام ئەم مەوادە بێکەڵک و زیانبارانە، کە بونەتە سەرچاوەى بڵاوبونەوەى جۆرەها نەخۆشى دڵ و خوێن و شێرپەنجە..و….لەبەر ئەوەى کۆمپانیاکانى سەر بەلایەنە دەسەڵاتدارەکان دەیهێنن، لە داهاتى نەوت بە نرخى باشترین کوالێتى بۆ خۆیان دەقەبڵێنن. دەرمانیش بە هەمان شێوەیە. ئێستا کار گەیشتوە بەوەى کە بەیەکجارى ئەو مەوادى خۆراکیە لە خەڵک ببڕن.
هاوکات سەرکوتى سیاسى و رۆژ بە رۆژ داهێنانى بڕیارو یاساى تازە بۆ زاڵکردنى ئیستبدادو ملهوڕى و ئیسلامیزەکردنى کۆمەڵگا، دێتە ئاراوە. هەڵسوڕاوانى سیاسى و چەپ و ئازادیخواز و رۆژنامە نوسان و رەخنەگران تیرۆرو سەرکوت دەکرێن، رابەرانى کرێکارى لەکار دەردەکەن و دەیانگوێزنەوەو نانبڕاویان دەکەن، رێکخراوە کرێکارى و جەماوەریەکان قەدەغە دەکەن، ناڕەزایەتى خەڵک بە گولە وەڵام دەدەنەوە، بە ناوى یاساى خۆپیشاندانەوە خۆپیشاندان قەدەغە کراوە، لە زانکۆو خوێندنگاکاندا دەرس و داب و نەرێتى ئیسلامى دەسەپێنن، بۆ نمونە بەشى مۆسیقاو شانۆیان لە بەشى “هونەرە جوانەکان” لابردووە…
خەڵکى عێراق و کوردستان لەدژى ئەمانە و چەندین شێوەى ترى بێمافى و ستەم بەدەنگ هاتوون. لایەنە ئۆپۆزیسیونە بورژوازیەکان، ئەوانەى دەستیان لەدەسەڵات گیرنیە یان لە بەشى خۆیان ناڕازین، هەوڵى زۆر دەدەن کە خواستەکانى خەڵک بشێونن و خەباتیان بەلاڕێدە بەرن، دەیانەوى سوارى شەپۆلى ناڕەزایەتى خەڵک بن، ئەو خەبات و قوربانیانە بکەن بە رێگایەک بۆ گەیشتن بە مەرامەکانى خۆیان. بۆ نمونە هەوڵدەدەن خواستەکانى بگۆڕن بۆ دووبارە کردنەوە یان پێشخستنى سیناریۆێ هەلبژاردن، کە ئاشکرایە ئەگەر سەدجارى تریش بە تایبەتى لەو هەلومەرجە داسەپێنراوەدا، دووبارەى بکەنەوە هیچ بە خەڵکى کرێکارو زەحمەتکێش نابڕێت و هیچ ئاڵوگۆڕێک لە ژیانیان دروست ناکات. یان دەیانەوێ خواستەکانى جەماوەر بە دروشمى “ریفۆم و ئیسلاحى نیزام” لە قاڵب بدەن. لە کاتێکدا نە لەسایەى ئەم دەسەڵاتە میلیشیایەدا ریفۆرمێکى ئەوتۆ مومکینە و نە ئەم دەسەڵاتە لە ئیسلاح کردن دێت.
رێگاى بەدیهێنانى خواستەکانى خەڵک و گۆڕانى ریشەیى لە ژیانى خەڵک تەنها لەو رێگایەوە بەدى دێت کە شۆڕشى خەڵکى عێراق، هەڵپێچان و لەکارخستنى ئەم دەسەڵاتە بە هەموو پارچەو پێکهاتەکانیەوە بکاتە بخاته‌ ده‌ستوری خۆیه‌وه‌ لە پێناو ژیانێکى ئازادو خۆشگوزەراندا. ئەمەش بەرادەى سەرەکى راوەستاوەتە سەر ئەوەى کە چینى کرێکارو مەراکزە کرێکاریەکان، ببێت بە کۆڵەکە و کانونە سەرەکیەکانى ئەم بزووتنه‌وه‌ شۆڕشگێڕانه‌یه‌. هەروەها ئێستا کاتى ئەوەیە کە بزووتنەوەى لاوان و بزووتنەوەى یەکسانیخوازى ژنان، وەکو هاوپەیمانە بەهێزەکانى بزووتنەوەى کرێکارى و چینى کرێکارو جەماوەرى زەحمەتکێش، ببنە بەشێکى گرنگ لە پێکهاتەى ئەم بزووتنه‌وه‌یه‌ و ئەم دەرفەتە بقۆزنەوە بۆ وەلانانى ئەو ستەم و بێمافیەى کە بەراستى ژیانى لێکردون بە جەهەنم.
کۆمۆنیست: حزبی کۆمۆنیستی کرێکاری عێراق و کوردستان، چ دەورونەخشێکیان لەدڵی نارەزایەتی و خۆپیشاندانەکاندا هەیە؟ چۆن دەتوانن مۆری کۆمۆنیزم بدەن لە روداوەکان؟
رێبوار ئەحمەد: ئەم دوو حیزبە لە چەند ئاستدا دەوریان هەیە لەم جوڵانەوە شۆڕشگێڕانەیەدا. کە دەکرێت بە کورتى باسی گرنگترین لایەنەکانى بەم جۆرە بکەین. لە پێشدا دەورى ئەوە دەگێڕن کە خواستەکانى خەڵک بە جۆرێک گەڵاڵە بکەن کە زامنى چارسەرى کێشەکانیان بێت و رێگا بگیرێت لەوەى دەسەڵات و لایەنە بۆرژوازیەکانى ئۆپۆزیسیون خواستەکانى خەڵک بشێونن و خۆڵ بکەنە چاوى خەڵک. لەم بارەیەوە هەردوو حیزب خواستەکانى خەڵیکان بە ڕۆشنى گەڵالەَ کردوەو هەوڵیانداوە جەماوەرى خەڵک و شۆڕش لە دەورى ئەو خواستانە تەوەرە ببەستن.
هاوکات هەوڵیان بۆ ئەوەیە شێوەو تاکتیکى گونجاو و کارساو بخەنە بەردەم ئەم بزووتنه‌وه‌ شۆڕشگێڕانه‌یه‌. شێوەو تاکتیکى گونجاوى ئەوتۆ کە دەرفەتى سەرکەوتن فراوان بکاتەوە. ئەمە مەسەلەیەکى گرنگە بە تایبەتى کە لایەنە بورژوازیە ناڕازیەکان، لە هەوڵى ئەوەدان کە لە جیاتى سەرکەوتنى خەباتى جەماوەرى، خەبات و ژیان و خوێنى خەڵک بکەنە دەستمایەى سات و سەودایان لەگەڵ دەسەڵات و رێگاى گەیشتن بە مەرامەکانیان. هەروەها ئەوان نایانەوى خەباتى جەماوەرى بە ئاراستەیەکدا بڕوات کە دەورو ئیرادە بۆ جەماوەر بگەڕێتەوە، کە بێگومان ئەمەش دەبێتە بنەماى ئەوەى جەماوەر بە هەلومەرج و دەسەڵاتێکى سەرو لە ئیرادەى خۆیان رەزایەت نەدەن. هەردوو حیزبى کۆمۆنیستى کرێکارى بە پێچەوانەوە هەوڵیان بۆ ئەوەیە خەباتى جەماوەرى لە ریسک و مغامەرەو خەڵتانى خوێن بوون و مەترسى شکست دوربخەنەوە، هه‌روه‌ها هه‌نگاو هه‌نگاو ئه‌م حه‌ره‌که‌ته‌ به‌ ئاقارێکدا براواته‌ پێش، که‌ له‌هه‌ر هه‌نگاوێکدا ده‌سکه‌وتێکی بۆ مسۆگه‌ر بێت و توانای هه‌نگاوی داهاتوی پێبدات. سه‌رئه‌نجام خەباتى جەماوەرى بەو بارەدا بڕواتە پێش کە هوشیارى سیاسى و ریزى سەربەخۆو رێکخراوبونى جەماوەر بگاتە ئەو ئاستەى کە زامنى گێڕانەوەى ئیرادە بێت بۆ جەماوەر، وەکو مەرجى بەردەوام بوون و پێسڕه‌وی تا سەرکەوتنى یەکجارى. لەم بارەیەوە هەوڵدراوە تەجروبەکانى مێژووى کۆمۆنیزم و دەرسە تازەکانى شۆڕشى میسرو تونس بخرێتە بەردەستى خەڵکى عێراق و کوردستان.
هەروەها هەردوو حیزب بە رێکخستن و کەسایەتى و رابەرانیانەوە، بەشداریەکى بەرچاو و بەکردەوەیان هەیە لە هەموو خەبات و خۆپیشاندانە جەماوەریەکان، بەشێکى بەرچاوى رابەران و هەڵسوڕاوان و ووتاربێژانى جوڵانەوەکەن.
بەشێکى گرنگ لە دەورى ئەم دوو حیزبە لەوەدا بەرجەستە دەبێتەوە، کە ئاسۆى ئەوە دەخنە بەردەم شۆڕش کە بۆ ئاڵوگۆڕى بنەڕەتى لە ژیانى خەڵک، بە ناچارى دەبێ ئەم دەسەڵاتە میلیشیاییە قەومى و ئیسلامیانە لەسەراسەرى ووڵاتدا لەکاربخرێن و دەسەڵاتێکى پیشتبەستو بە ئیرادەى راستەوخۆو بەردەوامى خەڵک لەسەر بنەماى سیستەمى شورایى جێگاى بگرێتەوە.
مەسەلەیەک کە دەتوانێ دەورى ئەم دوو حیزبە بەرجەستەتر و زەمانەتى سەرکەوتنى شۆڕش مسۆگەرتر بکات، هاوکات دەتوانێ بە شێوەیەکى زەقتر مۆرى کۆمۆنیزم بەم ئالوگۆراِنەوە بنێت و هەنگاوەکانى دواتر بەردەوام تا سەرکەوتنى تەواو زەمانەت بکات، ئەوەیە کە بە دەورى ئەم دوو حیزبە و رابەرانى کرێکارى و کۆمۆنیست، دەست ببرێت بۆ رێکخستنى جەماوەر لە شوراکان و رێکخراوە جەماوەرەیە جۆراوجۆرەکان. کە تا ئێستا ئەم کارە دەستى پێنەکردوە. هەروەها دەبێ ئەم دوو حیزبە موبتەکیرى ئەوەبن کە بزووتنەوەى کرێکارى و بزووتنەوەکانى ژنان و لاوان، وەکو کۆڵەکە ئەێڵیەکانى ئەم بزووتنه‌وه‌یه‌، بە رێزى رێکخراو و بە رابەرانى بەرجەستەو بە پلاتفۆرمى رۆشنى خۆیانەوە…دەرکەون.

گفتوگۆی بڵاوکراوه‌ی کۆمۆنیست له‌گه‌ڵ رێبوار ئه‌حمه‌د

مارسی 2011

Entry filed under: رێبوار ئه‌حمه‌د. Tags: .

دیپۆرتى په‌نابه‌ران سیاسه‌تیَكى دژى ئینسانى و كۆنه‌په‌رستانه‌یه‌ و ده‌بىَ به‌ته‌واوى تواناوه‌ له‌به‌رامبه‌ریدا رِابوه‌ستینه‌وه‌ خۆپیشاندان و کۆبونه‌وه‌ی جه‌ماوه‌ری له‌ سه‌رای ئازادی ده‌ستیپێکرد

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Trackback this post  |  Subscribe to the comments via RSS Feed


RSS هه‌واڵه‌کانی BBCی به فارسی

  • An error has occurred; the feed is probably down. Try again later.

RSS بابەتەکان لە بالاترین به فارسی

  • An error has occurred; the feed is probably down. Try again later.

RSS بي بي سي -العربية

  • An error has occurred; the feed is probably down. Try again later.

ژمــــاره‌ی ســــه‌ردان

  • 721,907 hits

%d bloggers like this: