مەریوان وریا قانع نوسەرو روناكبیر نامەیەكی ئاراستەی خۆپیشاندەرانی سەرای ئازادی

2011/03/22 at 6:00 AM Leave a comment

سه‌رای‌ ئازادی‌ شوێنێكه‌ بۆ خه‌ون و ئازادی

دەقی نامەكە:مەریوان وریا قانیع
دۆستان و ھاوڕێیان و ئازیزانی من لە نیشتیمان،
خۆشحاڵم جارێکی تر لە ڕێگەی ئەم نامەیەوە پەیوەندی بە ئێوەی ئازیزەوە بکەمەوە، پڕ بە دڵ حەزمدەکرد لەم ساتە مێژووییە دەگمەن و گەورانەدا لەناوتاندابم. ئەو ساتانەی ئینسان بە وشیارییەکی نوێوە مێژوویەکی نوێ و دونیایەکی نوێ و خەونێکی نوێ دروستدەکات.
ھاوڕێیان،
لە مێژووی مرۆڤدا ئەو ساتانە دەگمەنن کە ئینسان ھەستبکات دەست و پەنجەی بەشێوەیەکی ڕاستەوخۆ لەناو ھەناوی مێژوودایە، ئیرادەی خەریکی سەرلەنوێ نووسینەوەی ژیان و کۆمەڵگا و پەیوەندییەکانە. ھەستبکات عەقڵی خەریکی جێگۆڕکێیەکی ڕاستەقینە بە شتەکان. ئەم ساتانە چەند دەگمەنن، ھاوکات ساتی پاککردنەوەی بینین و بیستن و قسەکردنە لە خڵتە و غوباری ساڵە ناشیرینیەکانی مێژوو. ئەم ساتانە ساتی بوونی ئینسانە بە دروستکەری یەکەمی ژیانی خۆی، بە بکەری ڕاستەقینەی ژیانی ئەو کۆمەڵگایەی تیایدا دەژی. پڕ بەدڵ حەزمدەکرد ئێستا و لەم ساتە دەگمەنەدا، لەناو ئەم سەرای ئازادییەدا لەگەڵتان بم. پەنجەکانم لەپاڵ پەنجەکانی ئێوەدا بوایە بۆ سەرلەنوێ نووسینەوەی یاسا و بەھاکانی ئەو ژیانەی کە سبەینێ دروستیدەکەین. بەڵام بەداخەوە چەندان ھۆکاری تایبەت منی تا ئێستا لە دەرەوەی ئەو سەرایە ھێشتۆتەوە.

ھاوڕێیان من ئەم سەرای ئازادییە باش دەناسم، ھیچ شوێنێکی تری دونیا بە ڕادەی ئەم سەرایە ناناسم. من بڕێکی زۆری مناڵیم لەناو ئەم گۆڕەپانەدا بەسەربردوە. جارێک وەک کتێب فروش و جارێک وەک ڕۆژنامەفرۆشێکی دەستگێڕ و جارێکی تر وەک منداڵێک سەرسام بەشار لەم سەرایەدا ژیاوم. زیادەڕۆیی نییە گەر بڵێم لەگەڵ بست بە بستی ئەم مەیدانەدا حیکایەتێکی تایبەتم ھەیە. من لەم سەرایەدا ئینسانم دیوە گریاوە، تێکۆشەرم دیوە پەلاماری دوژمنانی داوە، خەڵکم دیوە سەمایان کردوە، کاسبکارم دیوە بژێوی ژیانی پەیداکردوە، نابینام بینیوە بەخەیاڵ دەستی لە ڕۆحی ئەم شارە داوە، گەنجم بینیوە لە سێدارە دراوە. ئەم سەرایە سەرای مێژووی کورد و ئینسانی کوردە بە ھەموو کارەسات و ئاھەنگەکانیەوە، بە تێکشکان و ھەستانەوەکانییەوە، بە گریان و پێکەنینەکانییەوە. ئەم سەرایە لەڕۆژی دروستبوونییەوە سەرای ژیان بووە. سەرایەک پڕ ڕووداو و حیکایەتی جیاواز.

بەڵام ھاوڕێیان، ئەو سەرایەی من بەدرێژایی تەمەنی خۆم ناسیومە و دواندومە سەرایەکی خەمباربووە، سەرایەک بووە دڵشکاو، پڕ قسە بەڵام بێدەنگکراو و ترسێنراو. من تەنانەت خەیاڵی ئەم سەرایەش دەناسم، دەزانم ھەمیشە خەونی بەوەوە بینیوە شتێکی تربێت، ناوێکی تر و ژیانێکی تر و گۆرانییەکی تری، ھەبێت. ڕووداوەکانیشی مەزنتر و جوانتر و ئینسانیتربێت. خۆشی زۆر زیاتربێت لەوەی کە ھەیە.

خۆشحاڵانە ئەمڕۆ کە لە دوورەوە وێنەکانی ئێوە و وێنەکانی ئەم سەرایە دەبینم، دەزانم سەراکەمان چیدی تەنھا خەون نابینێت، بەڵکو خەونەکانی دەژی، تەنھا خاوەنی خەیاڵێکی ئاگرین نییە، بەڵکو ئەو خەیاڵە سانتیمەتر بە سانتیمەتر دەکات بە واقیع، خۆشی تەنھا گۆڕەپانی تایبەتی شارێکی تایبەت نییە، بەڵکو وزەی گەورەی نیشتیمانێکە دەیەوێت جارێکی تر و سەدان جاری تر سەرلەنوێ لەدایکببێتەوە. بەدرێژایی تەمەنم من ئەم سەرایەم بەڕادەی ئەمڕۆ ئازاد و پڕئومێد و ناسک نەبینیوە. ھەرگیز بەقەد ئەمڕۆ نەژیاوە و ھەرگیز بە ئەندازەی ئەمڕۆکە شاعیرانە نەبووە. ئەم سەرایە جوگرافیایەکی نوێییە: جوگرافیای لەدایکبوونی سەرزەمین و نیشتیمانێکی نوێ.

ھەموو مێژوویەک ساتەوەختی تاریک و ڕووناکی خۆی ھەیە، زەمەنی ئومێد و نائومێدی تایبەتی ھەیە، ساتی نوچدان و ھەڵسانەوەی خۆی ھەیە. ئەوەی ئەمڕۆ لە نیشتیمانی ئێمەدا ڕوودەدات، ئەوەی ئێوە لەم سەرای ئازادییەدا دروستیدەکەن، داگیرسانی ھەموو چرا و ئەستێرە و ڕوناکییە کوژاوەکانی ناو مێژووی ئێمەیە. ئەوەی ئەمڕۆ دەگوزەرێت گەڕاندنەوەی ئومێدە بۆ ناو لەشی نیشتیمانێک لەوەدەچوو دڵۆپێک ئومێدی تێدانەمابێتەوە. ئەمڕۆ مێژووی ئێمە دەستدەبات ئەو خڵتە و غوبار و تەپوتۆڕانە دەسڕێتەوە کە بەرچاوی تاریکردوە. ئەوەی ئەو کارە گەورەیە دەکات ئێوەن، ئەوەی ئەم مێژووە تازەیە دەنووسێتەوە ئێوەن. ئەوەی ئەم سەرایە دەکاتە بێشکەی ئازادی، ئێوەن.

جارێکی تر سڵاوی من لە دوورەوە.

 مەریوان وریا قانیع

ئەمستەردام

٢٠-٣-

Entry filed under: مه‌ریوان وریا قانع. Tags: .

رۆژنامه‌نووسێك ســـێ بـــه‌ڵـــگه‌نـــامه‌ له‌سه‌ر بارزانی بڵاو ده‌كاته‌وه‌ له‌ رێوشوێنێکی ئه‌منی توندا،رێورەسمی جه‌ژنی نەورۆز و ساڵی نۆ له شاری مه‌ریوان له رۆژهه ڵاتی کوردستان بەڕێوەچو

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Trackback this post  |  Subscribe to the comments via RSS Feed


RSS هه‌واڵه‌کانی BBCی به فارسی

  • An error has occurred; the feed is probably down. Try again later.

RSS بابەتەکان لە بالاترین به فارسی

  • An error has occurred; the feed is probably down. Try again later.

RSS بي بي سي -العربية

  • An error has occurred; the feed is probably down. Try again later.

ژمــــاره‌ی ســــه‌ردان

  • 722,040 hits

%d bloggers like this: