مەلا حکومەتی ئیسلامی دەوێ!روناکبیر تۆچیت دەوێ؟

2011/04/12 at 5:56 PM Leave a comment

عوسمان مەلا:راپەرینێک کە دەمراستی مەلای کۆنەپەرەست و روناکبیری خەسێنراو بێت، دەبێ بۆ ئاکامەکەی بڵێین: “هەزاران خۆزگە بە جاران”، وە هەزاران رەحمەت لە کفن درو”. هەروەها میلەتێک کە مێژوی خۆی نەزانێ و چارەنوسی بداتە دەستی کەسانێکەوە کە دەێان جار تاقی کراونەتەوە،داهاتوی بداتە دەستی دوکاندارانی دین و بە ناو روناکبیرانێک کە دەێان جار راپەرین و شورشی خوێناویی ئەم میلەتەیان لەبار بردوە بۆ بەرژەوەندی حیزبی و شەخسیی خۆێان، بە دڵنیاییەوە ئەم میلەتە ناتوانێ روی ئازادی و بەختەوەری بە خۆێەوە ببینێت. میلەتێکی هوشیار و ئازادیخواز بۆ درێژ ماوە ناتوانێ چاو لە ئاست ئامانجە نا ئینسانیەکانی مەلاکان، یاسا دینیەکان، خەێانەتی سەران و زۆڵم بقونجێنی و تەنیا دەسەڵات دەست بەدەست بکا. هەروەها میلەتێکی ناهۆشیار و چاو نەکراوە و فەرامۆشکار، ناتوانێ ئازادی خواز بێت و بە ئازادی بگا. بە درێژایی مێژو، دیکتاتۆرەکان بە قوستنەوەی ناهۆشیاری، وەهم پەرەستی، خۆفریوی و فەرامۆشکاریی جەماوەر بون بە دیکتاتۆر.
راپەرینی ئەم جارەی کوردستان کە بە ئیلهام وەرگرتن لە راپەرینەکانی ئەفریقا و رۆژەهەڵاتی ناوەراست سەری هەڵداێەوە، درێژەی هەمان خەبات و شۆرش و راپەرینەکانی پێشوێە کە چەندین جار لە قۆناغە جوراجۆرەکان و هەل و مەرجی رەخساودا، لە کوردستان سەری هەڵداوە و هەر جارە بە هۆی ئەم مەلا و ناروناکبیرانەوە یان بەلارێدا براوە، یان بە هاوکاریی هەر ئەمانە، لە لاێەن دەوڵەتە فاشیەکانی ناوچەکە و ئەمپریالیستەکانەوە سەرکوت و لەبار براوە.
مەلا و ئیسلامیەکان حکومەتی ئیسلامی و دینیان دەوێ تاکو یاساکانی قورئان و ئەحکاماتی شەرعی ئیسلام بە زەبری شمشێر، زیندان، شکەنجە، پەتی سێدارە، ئێعدام، خەتەنەی کچان، فرە ژنی، مارە بە جاش، لێدان لە ژنان، سپاندنی فەرزە دینیەکان بە سەر منداڵاندا، حیجاب و نەریتی ١٤٠٠ ساڵ لەوەپیشی عەرەبستانی سعودی بسەپێنن. ئەی روناکبیر تۆ چیت دەوێ؟  ئاێا کەسێک روناکبیر و سەردەمی و عیلمانی و ئینسانی بیر بکاتەوە، دەتوانێ لەگەڵ مەلا و بیری تاریک ئەندێشی دینیدا بگونجێ و ناوی ئەم گونجانە بنێتە دێموکراسی؟ ئاێا مەلا و ئیسلام و ئیسلامیەکان لە هەر شوێنیکی دنیادا دەستیان گەیشتبێ بە دەسەڵات، دێموکراسییان پەیرەو کردوە؟ ئاێا نمونەکانی دەوڵەتە ئیسلامیەکانی وەک ئێران، ئەفغانستان، پاکستان و فەترەێەک دەسەڵاتی کورتی هەر ئەم مەلا و ئیسلامیە کوردانە لە هەڵبجە و خورماڵ و هەورامان کە پێکەنین گوناهی کەبیرە بو، بە سەدان ژن کوژران و خێلی حەمەێان سەر بری، هەروەک چلۆن پێغەمبەری ئیسلام ٧٠٠ کەس لە بەنی قورەیزەی سەربری، بەس نیە وەک بەڵگە و دلیل بۆ روناکبیری کورد؟ هەروەها دەسەڵاتی ٢٠ ساڵ خەێانەت و کوشتار و تاڵانگەریەکانی دەوڵەتی کوردی بە بەشداریی کەسانێکی ناودار و ناسراو کە لە کوشتاری چەپەکان و ژنان و شیوعیەکاندا روی سەدامیان سپی کرد، وە بە بەشداریی هەر ئەم مەلا و ئیسلامیانە لە خەێانەتەکان و گەندەڵیەکانی ئەم دەسەڵاتەدا، بەڵگە نیە بۆ کاکی روناکبیری کورد کە خەریکە دیسان خەێانەتی مێژویی دوپات دەکەنەوە و بە سواق دانی دەموچاوی خوێناویی ئیسلام بە رەنگی دێموکراسی، دەێانەوێ بۆ ٥٠ ساڵیتر جەماوەری کوردستان رەنج بەخەسار بکەن؟
بە درێژایی مێژو، ئیسلامیەکان و مەلاکان، سەرانی حیزبە نەتەوەییەکان و سەرۆک عەشیرەکان، ئەم راپەرینەێان وەک راپەرینەکانی پێشو لە ناوەرۆکی راستەقینەی خوی کە مافە ئینسانی و خواستە ئینسانیەکانی میلەتی کورد بوە و هەێە، هەلپەرەستانە بەتاڵیان کردوە و رەنگ و هەویە و مۆرکی دینی و نەتەوییان لێ داوە. لە ئاکامدا مەلاکان و ئەم بە ناو روناکبیر و سەرۆکانە، هەر بە پێی بەرژەوەند و قازانجی خۆێان، جار لە دوای جار ئاش بەتاڵ و سات و سەوداێان بەسەر راپرین و شورشەکانەوە کردوە. زۆر بە دڵفراوانیەوە هەم وڵات و هەم نەتەوەیان فرۆشتوە. دواتر وەک بەرزەکی بانان بۆی دەرچون و یان لە لاێان داگیرکەرانەوە کراونەتەوە بە کاربەدەست و لە دام و دەزگاکانی داگیرکەردا کەوتونەتە داپڵۆسین و سەرکوت، گرتن و شکەنجەی میلەت و لە هیچ جیناێەتێک دەستیان نەپاراستوە. هەر کاتێکیش ناو بە ناو دەسەڵاتیان کەوتوەتە دەست، لە فاشیە داگیرکەرەکان درندانەتر و بێ رەحمانەتر کەوتونەتە کۆشتار و دەمکوتی میەلەت. خودی میلەتیان بە جاش و بەکرێگیراوی بێگانە داناوە و بەم بیانوە سەرکوتیان کردوە. نمونەی ئەم راستیانە ٢٠ ساڵ دەسەڵاتی ئیسلامیەکان وحێزبە ناسیولنالیستەکانە لە کوردستان. نمونەێەکی دیکە هەر ئەم راپەرینەی دواییە کە تەقینەوەی رقی پەنگ خواردوی جەماوەری چەوساوەی کوردستانە، بە روی خەێانەتەکان و تاڵانگەریەکان و گەندەڵیەکانی دەسەڵاتی پێکهاتوە لەم حێزبە کوردی و ئیسلامیانە. هەر هەموێان بێ شەرمانە و بە خۆ دزینەوە لە تاوانەکانی خۆێان کە هۆکاری سەرەکین، جەماوەر تومەتبار دەکەن و دەڵێن: “دەستی دەرەکی لە پشت ئەم راپەرینەوەێە” هەروەها هەر خودی سەرانی بە ناو ئوپوزسیونی دینی و ناسیونالیست کە دورویانە و ریاکارانە گۆێا بەشدارن لە راپەرین و لە بەرەی خواستەکانی جەماوەردان، میلەتیان بە تێکدەر دانا و وتیان: “جەماعەتێک گێرە شیوێن دەێانەوی بارودۆخی کوردستان تێک بدەن”.
گرفتەکە ئەوێە کە، جەماوەری کوردستان هەموی ئەمانەی ناسیوە، کارنامەی خەێانەت و ناوەرۆکی هەلپەرەستانە و کۆنەپەرەستانەی ئەمانەی بە خۆێن و هەست و ئازار و ماڵویرانی و دەربەدەری تەجرەبە کردوە، بەڵام بە بێ هیچ لێکدانەوە و ئاورێک لە رابوردوی پڕ لە تاوان و جیناێەتیان، بە بێ بیر کردنەوە لە داهاتو، خۆی فریو دەداتەوە و چاو بەستراو و کوێرانە دەچیتەوە ژێر سەیتەرە و رێبەریی ئەم مەلا و روناکبیرە ساختەچی و هەلپەرەستانە.
هەر میلەتیک لاێەق و شیاوی ئەو دەسەڵاتەێە کە هەێەتی! میلەتێکی هوشیار و پێشکەوتنخواز و ئازادیخواز، عەقڵی خۆی و چارەنوسی ئینسانیی خۆی ناداتە دەستی کەسانیک کە سەدان ساڵە خەێانەتی پێ دەکەن و خوێن و خەباتی بۆ ئازادی، دەکەنە دوکانی سات و سەودا.
مەیدانەکان و سەراکانی کوبونەوەی جەماوەر ناو نراوەتە “مەیدانی ئازادی” بەڵام لە کردەوەدا، دیسانەکە بوەتە مەیدانی کونەپەرەستی و کوشتنی ئازادی و تێكشکانی کەساێەتی و حورمەتی ئینسانی کورد لە داهاتودا. دەمراستەکانی جەماوەر، مەلاکان و ئیسلامیەکانن کە ١٤٠٠ ساڵە لە جیهان بە گشتی و، کوردستان بەتایبەتی ئاکامی دین و دەسەڵاتیان تاقی کراوەتەوە. بەرهەمی دینی ئیسلام و مەلاکان، ئەو وەحشی گەری و درندەییانەێە کە دەر حەق بە ئینسان بە گەشتی و بەتایبەتی ژن کراوە و دەکرێ. کەچی میلەتی کورد کوێرە و ئەو وڵاتانە نابینێت کە مەلا و ئیسلام تێایاندا دەمراست و دەسەڵاتدارن. لە لاێەکیتر ٢٠ ساڵە میلەتی کورد لە کوردستانی باشور، کارنامەی خەێانەت و جیناێەت، هەلپەرەستی و سپڵەیی و ریاکاریەکانی روناکبیرانی نەتەوەیی خۆی تەجرەبە دەکا و لێی بێزار بوە، تورەیە، راپەریوە و داوای مافەکانی دەکا، بەڵام دیسانەکە بێهۆشانە و ناهوشیارانە کەوتوەتەوە دوای ئەوانەی کە ئەم هەلومەرجە نا ئینسانیەیان بۆ پێک هێناوە. سەرانی ئوپوزسیونی دینی و نەتەوەیی ٢٠ سالە شەریکی ئەم جیناێەتانەن کە پێکەوە، یان لە دژی یەکتر، دەرحەق بەم میلەتەی دەکەن، کە چی میلەت بە خوتبەێەکی درۆینەی چەند مەلاێەکی درۆزن و، ژمارەێەک روناکبیری ساختەچی، فریو دەخوات و لە بیری دەچێ کە هەر ئەمانە بون بەم دروشم و وتانە ئەم بەڵا و موسیبەت و رەنج بێوەریەێان بەسەردا هێناوە.
روناکبیرانی لیبرال-ناسیونالیست ئەمرۆ لە مەیدانەکانی کۆبونەوە جەماوەریەکاندا لەگەڵ مەلا و ئیسلامیە کۆنەپەرەست و بورژوازیی ئۆپۆزسیوندا بونەتە هاوسەنگەر و بە قوستنەوەی ستەمگەریەکانی دەسەڵات، دەێانەوی دیسان راپەرین لە جەوهەر و ناوەرۆکی چێناێەتی و ئینسانی خوی بەلارێدا بەرن و بیکەنە فیدای بەشدار بونی ژمارەێەکی دیکەی گەندەڵ بە دەسەڵاتی گەندەڵەکان. کەسانێک کە لە ناوەرۆکە نا ئینسانیەکانی داب و نەریتە کۆمەڵاتیە دینیەکان، لە خورافات و زیانە قەرەبو هەڵنەگرەکانی دین و مەلا و حیزبە قەومیەکان بە باشی ئاگادرن، بەڵام لە باس کردنیان خۆ دەپارێزن و چەواشەگەری دەکەن، یان لە ناو تەم و مژی دێموکراسی خوازیی درۆینە دا ونیان دەکەن، ئەمانە ئیتر کەسانی ساختەچی و خەێانەتکارن، نەک روناکبیر. ئەمانە روناکبیری خەسێندراون کە نەک هیچ جۆرە ترس و نیگەرانەکیان بۆ سەر بنەماکانی دەسەڵاتی گەندەڵ و ستەمگەر نیە، بەڵکو هەڵسوران و هەڵوێستەکانیان راست لە ئاراستەی خزمەت بە سیاسەتەکانی دەسەڵات داێە. ئەم روناکبیرانە کاریان داپۆشینی ناوەرۆکی سیستەم و دەسەڵاتی نا عادیلانە بوە و هەێە. بە گۆرینی برێک لە داشەکانی دەسەڵات و دەموچاوەکان رازی دەبن و بەم شیوەێە راپەرینەکانیان لەبار بردوە و دەیبەن.
ئاێا لە ئاکامە زیانبارەکانی کارنامەی دین و سەرانی ناسیونالیست، کە بەشیکی زۆری بە هۆی هەر ئەم دورویی، هەلپەرەستی، چەواشگەری و پاساوگەریەی روناکبیرانی نەتەوەییەوە سەپێندراوە، لەوانە داڕمانی باری فکری و ئەخلاقی، رێگریی لە پێشکەوتنی کۆمەڵاێەتی، گەشەی هەمەلاێەنەی باری سیاسی و ئابوری و کولتوری، نابێ دەرس وەر بگرین؟ ئاێا ئەم رەوشتە دورویی و ریاکاریانەی روناکبیرانی کورد کە خۆێان لە قەرەی راستیاکان نادەن، مەسڵەحەتی وڵات و میلەتە یان خەێانەت؟
سەردەمی ئێستا، سەردەمی بەدەست هێنانەوەی عەقڵ و شعور و هوشیاریمانە، سەردەمی خۆ دۆزینەوە، دۆست و دوژمن ناسی، خۆسازی و خۆرێکخستنەوەی زانستی و چێناێەتیمانە. کاتێ واز هێنانە لە تاقیکراوە زیانبارە دینی و حیزبیەکان. دەبێ نەک هەر واز هێنان، بەلکو لە دژی هەمو ئەو بیرۆکە و باورە دینی و زیانبارەانە راپەرین و لە ناو ژیان و کۆمەڵگاماندا ریشە کێشیان بکەین کە، بەرهەمەکەی ئەم بێ بەشی و نائومێدی و بێ ئاسۆییەی ئێستامانە.
کاتی ئەوە هاتوە کە بە دوای دۆزینەوە و لە پێش گرتنی هۆکارەکانی گەشە کردن و پێشکەوتن و رزگار بونی میلەتانی پێشکەتو بکەوین و بەکاریان بێنین، نەک کاتی خۆمان بە فێرۆ بدەین و گوێ بگرین بۆ بیستنەوەی ورێنەکانی ١٤٠٠ ساڵی لەوەپێشی مەلاکان و ئیسلامیەکان، درۆ و رایاکاریەکانی رونکابیرانی ناسیونالیست کە دەێانەوی رەنگ و رواڵەتی دێموکراسی و ئەخلاق بە دین و مەلا و دواکەوتویی بدەن.
ئەگەر روناکبیرانی راستەقینە و دڵسۆز، پلەبەرزانی دنیای ئەندێشەی ئینسانیی و ئازادیخوازانی وەک (بێرتراندراسێل، وڵتێر، ئەنشتەین، مارکس، رۆزالوگزامبورگ و ….، بە هەمان شیوەی ئەم روناکبیرانەی کورد رێگای جەبانی و دوروییان لە پێش گرتبا، ئاێا ئەمرۆ جیهان و بەتایبەتی وڵاتانی خۆێان دەیانتوانی شاهێدی ئەم پێشکەوتن و بەرهەمە ئینسانی و دەستکەوتە ئینسانیانە بن کە ماێەی شانازی و رێزی هەمو بەشەریەتە؟ ئاێا رەواێە لە لاێەک خۆمان بە هوشیار و ئاگادار و زانا لە کاروبار و رەمز و رێگای پێشکەوتن بزانین، بەڵام لە لاێەکیتر جەماوەر بێدار و ئاگا و هوشیار نەکەینەوە لە ریشە و بنەماکانی جەهالەت و هۆکارەکانی دواکەوتنمان؟ ئاێا ماێەی شەرمەزاری و رسوایی نیە بۆ کەسانێک کە خۆێان پێ روناکبیر و عیلمانیە، بەڵام لە گەڵ مەلا و دین فرۆشەکان داوای ئازادی و رزگاری لە مردوەکانی ١٤٠٠ ساڵ لەوەپێش دەکەن بۆ میلەت؟
شکستەکان و خولانەوەی بێ ئاکامی میلەتی کورد لە بازنەێەکی داخراوی بێ ئاسۆییدا، چەند تەوەرێکی سەرەکی هەێە کە کاریگەرترینیان دین و خەێانەتی کەسانێکی سەوداچیە بە ناوی نوسەر، هونەرمەند، زانا، فەیلەسوف، سیاسەتمەدار و ماموستای ئایینی کە هەر رۆژە لە سەر پەتێک یاری دەکەن.
کاتی ئەوە هاتوە کە روناکبیرانی چەپ و کومونسیت، گەنجان و ئازادیخوازانی دڵسۆز، هونەرمەندان و ئەدیبان، نوسەران و بێرمەندانی پێشکەوتنخواز، ژنان و پیاوانی یەکسانیخواز رێگا نەدەن مەلای کونەپەرەست و هەلپەرەستانی سازشکار و پەروباڵ کراوی بە ناو روناکبیر ببنە دەمراستی جەماوەر. ئەرکی روناکبیر ئەوەێە کە بە بێ پەردە و راشکاوانە جەماوەری چەوساوە لە وەهمیات و خورافات و ریشەدارترین رێگرەکانی ئازادی و گەشەکردنی کۆمەڵگا و بیری ئینسانیمان کە خورافاتی دینی و قەومیە، تێبگەێەنێت. بە چاوی خۆمان هەمو ئاکامە زیانبارەکانی سوڵتە و دەسەڵاتی دین و قەومیەکانمان لە وڵاتانی دین لێدراو و لە کوردستانیش بینیوە و دەبینین کە چلۆن ماڵووێران و ماێە پوج و رسوای کردوین. تا کەی ئەم بە ناو روناکبیرانەمان خۆڵ دەکەنە چاوی جەماوەر و لە لەقاودانی ریشەکانی ئەم بەدەبەختیەمان خۆێان دەپارێزن؟ دەبێ جەماوەری کرێکار و زەحکمەتکێش، گەنجانی کچ و کور، روناکبیرانی یەکسانیخواز و چەپ و کومونیستەکان ریزی چیناێەتی خۆێان لە هەلپەرسەتانی ناسیونالیست و مەلا و ئیسلامیەکان جیا بکەنەوە. حیزبە ئیسلامی و قەومیەکان هیچ جۆرە ناکۆکیەکیان لەگەڵ ئەم سیستەمە گەندەڵ و نا ئینسانیە نیە. ئەوان دەێانەوێ بە خۆ هەڵواسین بە راپەرینی ماف خوازانەی جەماوەردا خۆێان دەسەڵات بگرنە دەست، یان لە دابەش کردنی دەسەڵاتدا سەرپشک بن.
١٠/٤/٢٠١١

Entry filed under: عو‌سمان- م. Tags: .

چۆن دكتاتۆر،یان كه‌سه‌ سایكۆلۆژیه‌ت نه‌خۆشه‌كان بناسینه‌وه‌؟! وتو ویژی حسن معارفی پور له گه ل سیما نجم له هه لسوراوانی کومونیستی کوردستانی عیراق سه باره ت به گرنگ ترین روداوه کانی چه ند مانگی رابردو له باکوری ئافریقا و روژهه لاتی ناوه راست

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Trackback this post  |  Subscribe to the comments via RSS Feed


RSS هه‌واڵه‌کانی BBCی به فارسی

  • An error has occurred; the feed is probably down. Try again later.

RSS بابەتەکان لە بالاترین به فارسی

  • An error has occurred; the feed is probably down. Try again later.

RSS بي بي سي -العربية

  • An error has occurred; the feed is probably down. Try again later.

ژمــــاره‌ی ســــه‌ردان

  • 722,091 hits

%d bloggers like this: